Më 19 prill, kryediplomatja e Kosovës Donika Gërvalla e publikoi në Facebook letërnjoftimin e Shkëlqim Devollit të lëshuar nga Mali i Zi. Më në fund diçka serioze?! Hmmm…
Oligarku po denoncohej si dikush që kishte dokument ku mohohej Republika e Kosovës, e prandaj mohohej edhe “gjaku i derdhur për liri”.
Atë postim e shpërndau edhe kryeministri Albin Kurti. Ndërkohë, Sekretari Organizativ i VV-së, Alim Rama, u bëri thirrje të gjithë mbështetësve të VV-së që t’i bojkotonin produktet e Devollit.
600 komente në postimin e Gërvallës. 905 komente në shpërndarjen e Kurtit. 100 komente te Alim Rama.
Shumica dërmuese e këtyre komenteve e ndërtonin një fyerje horroriale ndaj Devollit. Dhe mos na keqkuptoni: ne besojmë fuqishëm se Shkëlqim Devolli është oligark. Por, duhet ta lodhim ngapak trurin e të pyesim në raste si ky: ku është problemi?
Kjo është njësoj sikur hajdutit që t’i ka vjedhë krejt kursimet e tua t’i thuash: “ti s’e don aq shumë Kosovën”.
Rimendojeni se çka ndodhi: po sulmohej Shkëlqim Devolli se e kishte një dokument të nxjerrë në kohën kur Mali i Zi nuk e njihte Kosovën si shtet. Iu publikua letërnjoftimi në Facebook. Po e shkelte gjakun e derdhur për liri – sipas Donika Gërvallës – sepse kishte dokument nga një shtet që s’e njihte Kosovën si shtet kur Kosova s’ishte shtet.
Më e shumta që mund të nxirret prej këtij sulmi nga ana e pushtetit është kjo: Devollët s’e duan me fanatizëm Kosovën; s’janë në gjendje të vdesin për Kosovën.
Kjo logjikë e Kurtit dhe Gërvallës i bën shkelës të gjakut të dëshmorëve krejt ata qytetarë me dokumente të Gjermanisë – që deri para pak kohësh s’i njihte qytetet e Kosovës si të Kosovës. I bën shkelës të ligjit edhe krejt shqiptarët e Kosovës me nënshtetësi të vendeve që s’e kanë njohur Kosovën. Ta zëmë, bukëpjekësi kosovar që jeton e punon në Spanjë dhe ka pasaportë spanjolle ka faj që ky shtet s’e njeh Kosovën. Jo udhëheqësit e shtetit.
Pse s’po i përmendet hajdutit fakti që t’i ka vjedhë kursimet e po i përmendet diçka kaq banale?
Ku mbeti oligarkia?
Qytetari i Kosovës vazhdon të jetë po aq i pashpresë sa më 13 shkurt 2021. Vazhdon të jetë po aq i paperspektivë. Puna e tij vazhdon të jetë po aq shfrytëzuese. Rritja e çmimeve ndërkohë, veç sa po ia rëndon edhe më zi gjendjen.
Qeveria e Kurtit nxiti shpresë të madhe thjesht me rreshtimin e saj kundër oligarkisë. Albin Kurti çka s’tha kundër Devollëve. Por, rreshtimi i saj kundër oligarkisë ishte dhe mbeti thjesht deklarativ.
Nga e thëna në të bërë, del se përnjëmend është një mal i tërë.
Përplasja me Devollët prej kur e morën pushtetin ishte banale. U sulmua në vazhdimësi mungesa e patriotizmit të fuqishëm prej tyre. S’u sulmua kapja e sektorëve të ndryshëm të ekonomisë. S’u sulmua dëmi që po i shkaktonin qytetarit të vendit. U sulmuan se kishin dokumente ku Kosova s’njihej si shtet.
Derisa Devolli thoshte se po i mbante me bukë 15 mijë familje (nganjëherë e ulte numrin në 4 mijë, por s’ka lidhje), Kurti s’lodhej të elaboronte sesi 285 mijë familjeve tjera kosovare po ia rëndonte jetën kjo kompani. Po i akuzonte thjesht që s’ishin patriotë të mëdhenj, siç ndodhi tash dhe siç ndodhi më herët në rastin e dokumenteve të Klan Kosovës.
A harruan përnjëherësh nga pushteti i Kurtit se çfarë dëmesh shkakton një oligark? Hmmm, s’na e merr mendja.
Çka atëherë?
A e mbani mend sesi u mashtrua Kurti nga dy rusët në muajin shkurt? Eh, edhe në ato momente – në një bisedë që besonte se po e bënte me kryeministrin e Letonisë – ai mendjen e kishte te Devollët. Pra, kjo na tregon se prokupimi i tij për ta luftuar oligarkinë është i vërtetë. Ose të paktën, preokupimi me Devollët është i vërtetë.
Pyetja që logjikisht vjen është: pse atëherë s’po i lufton oligarkët si oligarkë?
Janë dy mundësi: 1) Kurti po i shantazhon që të nisin shërbimin ndaj regjimit të tij; 2) Kurti po i sulmon indirekt pushtetarët e Devollëve në gjyqësor, media, ushtri, biznes.
Cilado qoftë e vërteta, kjo është taktikë e një mendje të lodhur që do ta shpie drejt humbjes. Dhe do t’i lërë qytetarët e Kosovës të pambrojtur.