Më 20 shkurt, ditë e enjte – ditë kur Fatmir Limaj do t’i thoshte fjalët virale që pushtuan rrjetin – KEDS-i do ta alarmonte popullin e Kosovës: i kishte zënë disa taksi në Prishtinë duke e vjedhë rrymën.
“Kurrsesi të mbushet mend!” – shkruante KEDS-i në Facebook për kompaninë e taksive.
Admini i faqes së KEDS-it tha se e kishte zënë pronarin e kësaj kompanie të taksive duke vjedhë rrymë edhe në muajin tetor. Kjo kompani e taksive operonte me vetura elektrike. Kuku, kuku, kuku!
Një javë më parë, KEDS-i ishte nervozu edhe më zi: “SKANDAL në Stan-Tërg: TRAFO në qendër të vëmendjes për vjedhje masive!”
“…më shumë se gjysma e rrymës vidhet pa turp!” Imagjinoni! Drita juaj, e ardhmja juaj po rrezikohen…”
Kjo nervozë s’është që s’na frikëson! Fundja, KEDS-i e ka në dorë rrymën, dhe… mundet me na e ndalë. E derisa këto alarme e leksione morale po bëheshin në Facebook, po ata kishin kërku shtrenjtim të çmimit të energjisë elektrike në ZRRE-në e famshme. Bashkë me KOSTT-in dhe KESCO-n.
Një diskutim i madh publik kishte fillu nëpër platforma si Facebook apo në studio televizive. S’e dimë mendimin e pronarit të kompanisë së taksive me rrymë. Meqë e vjedhte rrymën, e shumë gjasë është kundër shtrenjtimit.
Nejse.
Kjo e nxiti Zyren e Rregullatorit me dalë me një sqarim. Aty thoshte se ende s’kishte asnjë vendim, por inkurajonte konsultimin publik.
“Deri në publikimin e raportit për konsultim publik, ZRRE-ja nuk mund të japë asnjë qëndrim për mundësinë e ndryshimeve të tarifave të energjisë elektrike për vitin 2025.” – shkruante ZRRE-ja.
Para këtij sqarimi kishte një tjetër, ku thuhej se komentet nga palët e interesuara mund të dorëzoheshin deri më 26 shkurt 2025. Pra, deri sot. Si duket, ky afat u shtye pas presionit publik.
Ndërkohë që vlonte diskutimi, Facebook-u i KEDS-it s’e thoshte asnjë fjalë për kërkesën e tyre që të shtrenjtohej energjia elektrike. Ishte i zënë në qortimin e vjedhësve të rrymës.
Nejse, e gjetëm kërkesën. Ndodhet në faqen e ZRRE-së. Ishte shkruar nga Kryeshefi Ekzekutiv i KEDS-it – jo nga admini i faqes në Facebook – me emrin Alpin Dogan. Alpin, jo Albin. Dhe Dogan, jo Erdogan.
Arsyet
Arsyet e paraqitura në këtë letër janë – për ne – të mjegullta.
Albin Erdogani – na falni, Alpin Dogani – merrej edhe me rritjen e pagës minimale në 350 euro. Sipas tij, KEDS-in e kishte dëmtu kjo gjë sepse… nënkontraktorët tash duhej t’i paguanin punëtorët e sigurimit të objekteve fizike e të mirëmbajtjes me rrogë 350 euro.
Ajo që kuptuam nga kjo është se punëtorët e nënkontraktorëve të KEDS-it – gjithë kësaj kompanie, hej – paguheshin më pak se 350 euro. Kjo i kishte rritë kostot për ta. Por, në letër s’tregohej sa saktë.
Por, ka edhe arsyetime tjera: “…Për shkak të parashikimit jo të saktë të energjisë së prodhuar në vend, është shfaqur nevoja për të mbuluar kërkesën përmes importit të energjisë elektrike. Çmimet e larta të importit kanë rezultuar në një kosto shtesë prej mbi 37 milionë eurove krahasuar me nivelin e lejuar nga ZRRE…”
Kryeshefi i KEDS-it thoshte edhe se nëse nuk shtrenjtohej çmimi i rrymës aëtherë kjo e rriste rrezikun për “operim dhe zvogëlon kapacitetin për të bërë investime të nevojshme në infrastrukturë dhe shërbime.”
Përveç kësaj, në këtë letër ai thotë se mos-shtrenjtimi i rrymës çon edhe në mos-rritjen e pagave për punëtorët e KEDS-it. Diçka që sipas tyre do t’i demotivonte më tej ata duke i shtyrë edhe që të largoheshin.
Në letër, kryeshefi na flet edhe për tjera arsye. Ndërkohë, është e zorshme të kuptohen e verifikohen shifrat e paraqitura në mënyrë që me pasë mendim më të informuar. Fatmirësisht, nuk përmendi direkt taksistët apo vjedhjet në Stan-tërg.
Por, pse s’u postuan këto në Facebook si “Skandali” në Stantërg apo mosmbushja mend e pronarit të taksive në Prishtinë? Publiku do të ishte shumë më mirënjohës.