Dembelia e Albin Kurtit në qeverisje po bëhet gjithnjë e më radikale me kalimin e muajve. Dhe për fat të keq, ky s’është thjesht një fat i keq. Është më shumë se kaq.
Gjatë ditës së djeshme, Zyra e Rregullatorit të Energjisë (ZRRE) vendosi që ta shtrenjtonte çmimin e energjisë elektrike për 16.1 për qind. E hëngrëm të gjithë. Përfshirë ata dhjetëra mijëra qytetarë që hoqën keq duke kursy sipas udhëzimeve të Qeverisë Kurti. Përfshirë ata që i rritën harxhimet për inat të Qeverisë Kurti.
Askush s’e tha ndonjë fjalë. Bile edhe ministrja Artane Rizvanolli – e deleguar që ta bënte ‘luftën’ sa për sy e faqe në emër të Qeverisë – u hesht.
Marrë parasysh këtë heshtje kaq të turpshme, një pyetje shtrohet vetiu: ku është njeriu që e paguajmë për të qenë kryeministër? Me çka po merret?
Me formim të Qeverisë së Re?
Meqë doli i pari më 9 shkurt, Kurtit i takon të fillojë pazaret për ta formuar Qeverinë e Re. Dhe, këtu na ekspozohen së pari shenjat e radikalizimit të dembelisë së tij.
Gjendja është kjo: i ka 48 deputetë, i duhen edhe 13 për ta bërë Qeverinë dhe potencialisht edhe 32 për ta siguruar Presidenten.
Prej 9 shkurtit, Kurti abstenoi krejtësisht nga pozita e tij si njeriu më i votuar në Kosovë. Pas një fyerje që e bëri ndaj rivalëve politikë dhe votuesve të tyre, u mbyll në Kështjellën e Fildishtë dhe s’u mor me ta. E s’u mor as me Qytetarët e Kosovës.
Lëvizjet e tij në muajin prill janë aq dembele e të çrregullta sa s’duan koment.
Veprimi dembel 1: Kishte darku me Fatmir Limajn, që ia kishte lënë të hapur derën për bashkëpunim para një muaji e gjysmë.
Veprimi dembel 2: Më vonë, meqë ishte shumë dembel për të ndërruar ambient, i ftoi në Zyrë të Kryeministrit deputetët e minoriteteve etnike që të fliste për bashkëpunim.
Veprimi dembel 3: Pasi ata shprehën kërkesat e tyre, Albin Kurti vendosi t’i intimidonte duke i lidhur me kryeterroristin Millan Radojiçiq e me disa serbë të dënuar për tejkalim shpejtësie diku në Kosovë.
Veprimi dembel 4: Në një shenjë të qartë dëshpërimi, në fund ai vendosi t’i çonte letër kryetarit të LDK-së duke e ftuar në takim. Natyrisht, u refuzua.
Çka bëri këtë muaj?
Raportimi që Zyra e Kryeministrit e bëri për punën e kryeministrit është tepër i trishtë.
Takimet:
Kurti përgjatë këtyre ditëve ka takuar ambasadorët e Italisë, Belgjikës, Bullgarisë, Gjermanisë, Suedisë dhe El Salvadorit. Po ashtu edhe të ngarkuarin me punë në Ambasadën e Japonisë.
Ai ka takuar edhe alpinisten Uta Ibrahimi, artisten Merita Toçila, kryetarin e Bashkësisë Islame në Bosnje, deputetin që është edhe tifoz i Leeds Utd Alex Sobel, kryetarin e Ulqinit Genci Nimanbegu, deputetë të komisionit britanik për Punë të Jashtme, një grup nxënësish nga Bosnje e Hercegovina, Sekretarin e Jashtëm David Lammy, shefin e zyres së BE-së në Kosovë dhe aktivisten Sonja Biserko.
Vizita:
Shkoi në të pame te një familje e veteranit të UÇK-së. Bëri homazhe te varret e dëshmorëve në Kaçanik. Bëri homazhe në Rakoc të Kaçanikut. Bëri homazhe te Lagja e Re në Kaçanik. Bëri homazhe për betejën e Koshares. Bëri homazhe në Rezallë të Kunderajit. Shkoi në të pame te polici i vrarë, Muhamet Lika. Në përurim të çerdhes në Rezinë të Gjakovës. Shkoi në një ceremoni të Universitetit “Haxhi Zeka” në Pejë.
Letra, fjalime:
Foli në një konferencë të organizuar nga FES.
Foli në një diskutim të organizuar nga Ambsaada e Kosovës në Bruksel dhe Qendra për Studime të Politikave Evropiane.
I dërgoi letër ngushëllimi familjes së aktores së ndjerë Margarita Xhepa.