“Me një anë na thoni se në atë dynja na presin 777 hyrija, e n’këtë dynja veç kshyrni qysh me nxanë për veti diçka!” – ishin fjalët e një komentuesi në statusin e një hoxhe që pardje e lajmëroi një rast të rëndë. Shumë të rëndë.
Feim Dragusha nga Bërnica e Ulët ose e Poshtme po njoftonte se një hoxhë tjetër ia kishte marrë gruan. Kjo kishte ndodhur dikur para se të niste muaji i shenjtë i Ramazanit. Ai kishte pritur gjithë këtë muaj dhe pastaj e kishte lajmëruar rastin para publikut.
Sipas fjalëve të tij, hoxha nga një fshat i Vitisë ia kishte marrë gruan kur ajo ia dërgoi një shoqe për “rukje”. Pra, ajo ia dërgoi një shoqe për ta shëruar e hoxha e mori për grua të dytë. Edhe pse ishte veçse e martuar.
*Rukje është përpjekja që të shërohet një person përmes leximit të disa ajeteve kuranore.
“Imami S*** S*** duke u thirrë si një rukjexhi dhe duke keqpërdorur hapësirat e xhamisë, ka prekur në moralin tim dhe të familjes Dragusha”. – shkruan hoxha.
“Për ta mbrojtur veten nga ky skandal, imami S*** S*** e nxit gruan time që t’më denoncoj në polici kinse për “dhunë në familje” gjithnjë me qëllim që t’më burgosin, e ai pastaj të bëj qejf me gruan e huaj…” – vazhdon tutje.
Hoxha në fjalë po e bënte publik atë reagim shkaku se nuk po i merrej parasysh kërkesa që të përjashtohej hoxha që i kishte marrë gruan.
Çka s’tha tjetër hoxha Feim. Dhe fjalët e tij u bënë virale. Ai u bë “popular now” në Facebook e gjetiu! Doli në portale të ndryshme në vend. Por, ato që tha – përkundër akuzave shumë të rënda – ishin të mjegullta. Si ndodhi që në xhami t’i martohej gruaja tinëz? Meqë e bëri publik atë fjalë e njollosi gjithë ata njerëz, publiku pyet.
Të shkojmë tutje.
Përveç hoxhës që i mori gruan, ai akuzonte edhe një tjetër me emrin Bali Sadiku se e kishte mbrojtur këtë akt. E madje, e akuzonte edhe myftiun Naim Tërnava.
Kush është hoxha denoncues?
Hoxha në fjalë duket mjaft i angazhuar në rrjete sociale. Feim Dragusha duket se ka studiuar gjerësisht në lidhje me ndihmën që shteti i Bruneit i ka dhënë Kosovës. Dhe se për atë ndihmë, e ka botuar edhe një libër të cilin e ka prezantuar edhe te kabineti i Shkelqësisë së saj, Presidentes Vjosa Osmani Sadriu.
“Sot, më datë 21 nëntor 2024, u prita në një takim të ngrohët nga stafi i presidentes së Republikës së Kosovës për t‘i dhuruar librin “Kontributi i popullit dhe qeverisë së Bruneit për Kosovën”. Në këtë takim frytdhënës u prita nga zonja Rejhan Vuniqi dhe Bekim Kupina, me të cilët biseduam për Sulltanatin e Bruneit dhe kontributin e madh që ky vend ka dhuruar për popullin e Kosovës, e veçanërisht në fushën e arsimit dhe edukimit.” – shkruante Dragusha në blogun e tij personal.
Duke qenë se ka kontakt edhe me zyren më të rëndësishme të vendit, a mund ta çojë rastin deri në këtë instancë? Kushedi.
Sado që Tjetër provon të mbrojë privatësinë e të lartpërmendurve, duhet pranuar se tash është vonë. Portalet po e bëjnë namin me akuzat e tij sensacionale. Madje, shiheni mirë fotografinë e mësipërme: ai paraqet dy fjali që duken sugjerime për tituj portalesh. “Hoxha nga Drobeshi ia merr gruan hoxhës nga Prishtina?”
Pse të shkruar për veten në veten e tretë?
A ia vlejti publikimi që bëri hoxha? Pyeteni hoxhën, i cili tashmë e ka fshirë statusin.
P.S. Bigamia është e ndalueshme në Republikën e Kosovës dhe dënohet me burgim deri në një vit.