Zgjedhja e Dimal Bashës në pozitën e Kryetarit të Kuvendit befasoi të gjithë qytetarët e Kosovës, pavarësisht partisë, etnisë, fesë apo orientimit seksual. Sidoqoftë, duket se kjo zgjedhje nuk ka befasuar misionin e NATO-s në Kosovë që në një raport sekret e vlerësonte ferizajasin si “shef real” brenda Vetëvendosjes.
Në vitin 2015, kryetari i Vetëvendosjes quhej Visar Ymeri. Megjithatë, shërbimet inteligjente dhe jointeligjente kishin njohuri se shefi real i kësaj partie kishte emër tjetër. Quhej Albin Kurti.
Historia duket se është përsëritur (nuk është mësuar)
Në vitin 2025, kryetari i Vetëvendosjes quhet Albin Kurti. Megjithatë, inteligjenca e KFOR-it me anë të një raporti sekret thotë se shefi real i kësaj partie ka emër tjetër. Quhet Dimal Basha.
Provat
Në këtë raport të vitit 2024 përmendet fakti se Basha u bë figura qendrore e reprezentimit të Vetëvendosjes në debatin politik vendor.
“Basha në mënyrë të mistershme u bë figura qendrore e reprezentimit të Vetëvendosjes në Kuvend të Kosovës dhe media, përkundër faktit se 1) ishte anëtarësuar fare vonë në këtë parti; dhe 2) numri i deputetëve dhe figurave të kësaj partie në nivel ekzekutiv (ministra, zv. ministra) e kalonte njëqindëshin. Si mund ta veçonte veten një figurë si Basha – me kulturë mjerueshëm të varfër komunikative – mes qindra figurave tjera të Vetëvendosjes po të mos ishte ai njeriu kryesor i saj?” – shkruan një paragraf i këtij raporti.
Në një tjetër prova është edhe më goditëse.
“Në paraqitjet e tij publike, Basha ishte i vetmi që nuk i nënshtrohej kontrollit diskursiv partiak. I vetmi që jepte ide të padëgjuara më parë dhe i vetmi që guxonte të sulmonte opozitën më zi se kryeministri Kurti. Derisa gjuha e Kurtit po zvogëlohej e zvogëlohej, ajo e Bashës po rritej e po rritej.”
Mes provave tjera të listuara për pushtetin sekret të Dimal Bashës, përmendet edhe sulmi që ky i kishte bërë ministrit Liburn Aliu për lejimin e ndërtimeve në Ferizaj.
Kurti ‘kukull’ e Bashës
Ky raport sekret e portreton figurën kryesore politike në Kosovë, Albin Kurtin, thjesht si një ‘kukull’ në duart e Dimal Bashës.
“Të paktën prej vitit 2023, z. Albin Kurti është vënë nën kontrollin e plotë të z. Dimal Basha. Me urdhër të tij janë spastruar radhët e kësaj partie nga elementet konservative. Janë larguar figura të ndryshme si Eman Rrahmani, Visar Korenica ndërsa pritet largimi apo margjinalizimi i të ngjashmëve. Po ashtu, besohet nga burime të ndryshme se ishte z. Basha që ka urdhëruar Kurtin të dilte në paradën e Krenarisë në qershor të vitit 2024 për herë të parë.” – shkruhet në një pjesë të raportit.
Ky raport i KFOR-it shton se z. Basha do ta zbulojë veten si njeriu kryesor i Vetëvendosjes së shpejti, duke përmendur edhe pozitën që tashmë e mban: atë të Kryetarit të Kuvendit.
“Ideja e tij është që së pari me anë makinacionesh të ndryshme të bëhet kryetar kuvendi, e më pas edhe president. Por, më vonë ai do të kërkojë nga Kurti që t’i transferojë popullaritetin e madh për të marrë edhe pozitën e kryeministrit,” – thuhet tutje.
Ky raport sekret nuk tregon se si ndodhi që Kurti t’i nënshtrohej Bashës, por megjithatë e jep një ide.
“Nga informacione të paverifikuara thuhet se Kurti po shantazhohet nga Basha me anë të një videoje ku i pari shihet duke vjedhur rrymën në shtëpinë e tij 230-metërshe në lagjen Taslixhe për të cilën paguan nga 250 euro në muaj,”
*Shiko rubrikën në të cilën ndodhet ky tekst për ta kuptuar seriozitetin e tij.