Këto janë çaste të rrezikshme për LDK-në. Partisë me demokracinë e brendshme më të zhvilluar po i lëkunden themelet.
I fundit u bë Driton Selmanaj. Para tij, ishte Hykmete Bajrami. Para Hykmetes, Arben Gashi. Para Arbenit, Rrezarta Krasniqi.
Këta s’janë kurrkushi. Janë emra të mëdhenj në LDK që po i japin legjitimitet dyshimeve të rënda se pati manipulime me vota në këtë subjekt politik. Brenda këtij subjekti politik. E ndoshta edhe nga ky subjekt politik.
Tashmë, disa dyshime edhe janë vërtetuar nga ana e Prokurorisë Themelore në Mitrovicë. Aty ishte dëshmuar se i ishin shtuar vota kandidatit Xhafer Tahiri, dhe i ishin heqë disa tjerëve – përfshirë babain e Edon Zhegrovës.
Kjo si duket i nxiti edhe kandidatët tjerë për deputetë nga LDK-ja që të kërkonin rinumërim.
“Procesi i votimit në përfaqësitë diplomatike dhe rezultati i votave të mërgatës që kanë votuar përmes postës, kanë nxjerrë në sipërfaqe skema të organizuara për manipulim masiv të votave brenda subjekteve politike.” – shkroi Driton Selmanaj.
Ashpërsi të ngjashme kishin edhe deputetët tjerë të lartpërmendur.
Por, çështja s’është thjesht integriteti i votës për kandidatët për deputetë. S’mund të thuhet thjesht “te krejt partitë vidhen votat e kandidatëve”.
Vjedhjet e konfirmuara dhe dyshimet për vjedhje tjera vijnë saktësisht pas dyshimeve serioze për manipulim me vota edhe në nivel subjektesh te votat e diasporës me postë. Kjo e bën gjithë votën e LDK-së – që s’u rrit as afërsisht sa shpresonte – të jetë me hije dyshimesh.
Më 5 mars, Lumir Abdixhiku me një agresivitet të paparë iu turr njerëzve që hidhnin dyshime mbi rezultatin e votave me postë për kandidatin Hysen Çekaj.
“Mllef e plot vrer për një djalë të ri nga mërgata, sepse merr vota, merreni me mend, nga vet mërgata.” – shkruante Abdixhiku.
E kishte fjalën për Vetëvendosjen.
Por, problemi është se dyshimet me rezultatin e Hysen Çekajt po shprehin tash edhe kandidatët e tij për deputetë. Dhe, problemi është se dyshimet për rezultatin e LDK-së shprehin edhe plot qytetarë tjerë – përfshirë votuesit e LDK-së.
Ky është moment tepër i rrezikshëm për LDK-në. Nëse kryetari i kësaj partie nuk kërkon rinumërim dhe dënim të atyre që kanë abuzuar me votën qytetare – kushdo qofshin – atëherë ky mund të jetë fundi i partisë më të vjetër parlamentare të Kosovës.
Besimi i LDK-së te demokracia dhe tendencat autoritare të Kurtit përbëjnë motivin kryesor të përplot votuesve për me votu partinë e drejtuar nga Abdixhiku. Por, nëse kreu i LDK-së në një moment kyç i kthen shpinën një elementi kaq thelbësor si integriteti i votave atëherë… “çonu burra s’ka kurrgjë këtu” – që thotë Agim Veliu.
Lumir Abdixhiku duhet të vendos: a është me Hykmete Bajramin, Driton Selmanajn e Arben Gashin apo me hajdutët e votës?!
Kaq për këtë javë, të dashur lexues. Javën tjetër do të vijmë me disa artikuj surprizë.