Ndaras prej njëri-tjetrit, thuajse në të njëjtin kohë (fundi i shekullit 17), Gottfried Leibnizi dhe Isaac Newtoni e zbuluan kalkulusin. Ndaras prej njëri-tjetrin, thuajse në të njëjtën kohë (sot, njëri në orën 10:45 e tjetri në orën 10:48) Çun Lajçi me Rexhep Qosja e na e zbuluan një tallje hyjnore me vendin tonë.
Ora 10:45
Çun Lajçi – një aktor e shkrimtar me nam për kushtet tona – shkroi në Facebook për një personazh të një ‘reality show’. Ishte një glorifikim i përmasave të pabesueshme. Një varg lëvdatash që ngjanin me ato që i bëjmë për heronjtë më të mëdhenj.
“Ta dua guximin, energjinë, elanin, dëshirën për të bukurën, për të paarritshmen, për jetën përtej mureve, tej grilave; dëshirën për ta vënë në sprovë vetveten dhe për t’u ballafaquar me një forcë që tejkalon tënden!” – thoshte Lajçi në postimin e tij që deri në këtë moment (ora 12:37) i numëron mbi dy mijë pëlqime.
Nga fjalët tjera të këtij postimi kuptojmë se Lajçi – aktor 78 vjeçar – është një shikues pasionant i këtij ‘reality show’.
Ora 10:48
Rexhep Qosja – një shkrimtar dhe publicist me nam për kushtet tona – shkroi po në Facebook një akuzë të rëndë ndaj sistemit gjyqësor e prokurorial të Kosovës.
“Ata e kanë formuar një kartel (një DIKTATURË GJYQËSORE) dhe po mbrojnë korrupsionin sistemik që i solli në postet e tyre.” – tha ai. Nuk dha asnjë provë, asnjë argument. Të paktën, ndonjë që mëson të rinjtë sa për t’i mësuar të rinjtë të komunikojnë më me kulturë me njëri-tjetrin. Që i mëson të mos bëjnë thashetheme. Të mos akuzohen pa prova. Që kur tjetri të thotë diçka për dikë, ti ta pyesësh: po bre, ama ku janë provat e argumentet?!
E për më keq, akademiku 89 vjeçar e kishte bërë edhe një fotomontazhë – si duket me Inteligjencë Artificiale – ku dukeshin disa gjyqtarë, çekani i drejtësisë, do grila, dhe disa njerëz të maskuar. Ishte dramatike. Ishte e frikshme. Ishte e errët.
Pavarësisht se çka mendojmë për sistemin tonë të drejtësisë, besoj pajtohemi të gjithë se është e padrejtë të hedhim akuza të pabaza e të bëjmë fotomontazha të errëta e të frikshme me Inteligjencë Artificiale?
Çka na thotë kjo?
Marrë parasysh që këto postime i kanë ndërmjet veç tre minuta, mundet me qenë një tallje hyjnore me shoqërinë tonë. Një tallje që thotë: “Ja, këta ishin në krye të gjeneratës që e ndërtoi Kosovën. A mendon ende se ia vlen me jetu këtu?”