Kryeministri i Republikës së Shqipërisë, Edi Rama, ka njoftuar se do ta nominojë presidentin amerikan Donald Trump për çmimin Nobel për Paqe pas shpëtimit që ky i fundit i bëri Shqipërisë në luftën kundër Azerbaixhanit.
Kryeministri Rama duket se ka vendosur që të ndjekë të njëjtin kurs veprimi si presidentja Vjosa Osmani në lidhje me fjalimet e presidentit amerikan Donald Trump në kuadër të fushtatës për të fituar çmimin Nobel për Paqe.
Edhe Rama vendosi që ta shtynte përpara këtë agjendë, duke mos kundërshtuar pohimin e fundit (që u quajt dashakeqësisht si huqje nga media të ndryshme) të presidentit amerikan kur tha se e kishte shpëtuar Shqipërinë nga lufta me Azerbaixhanin.
“Kush jemi ne ore të korrigjojmë presidentin e ShBA-ve? Nëse ai ka thënë se e ka ndaluar luftën mes Azerbaixhanit dhe Shqipërisë, atëherë kjo është e vërteta këtej e tutje. Mos ka menduar për Armeninë? Jo ore, ajo mes Armenisë dhe Azerbaixhanit ishte tjetër. Pse nuk gëzoheni njëherë ju gazetarët e të thoni shyqyr që presidenti i Amerikës e zuri në gojë Shqipërinë tonë të vogël?!” – u shpreh Rama i irrituar ndaj gazetarëve.
Trump u shpreh në një intervistë për Mark Levin se kishte ndaluar një luftë që zgjati për 34-35 vjet mes Azerbaixhanit dhe Shqipërisë, e për të cilën njerëzit i thoshin “jaaa, këtë luftë kurrë s’mund ta ndalësh”.
Dëgjojeni çka tha Trumpi në këtë pjesë:
Shumë media kundërshtare të Trump po thonë se ai e ngatërroi Shqipërinë me Armeninë (Albania-Armenia). Por, kur merret parasysh se çka thoshte për Kosovën dhe Serbinë atëherë kjo ndoshta s’është e vërtetë.
Trumpi në disa raste e kishte përsëritur se ndaloi luftën mes Kosovës dhe Serbisë, fillimisht duke aluduar se kjo ndodhi në mandatin e parë e më pas duke e rritur pretendimin e tij në “tri javët e fundit” në muajin korrik.
Presidentja Osmani e kishte mbrojtur Trumpin nga dyshuesit duke thënë po ashtu se Serbia ishte vend armiqësor dhe tekefundit kush ishim ne të denim më shumë se presidenti i Amerikës.
*Shiko rubrikën ku ndodhet ky artikull.