Talenti i jashtëzakonshëm i Hajrulla Çekut

Sapo e përfundova së lexuari shkrimin e Gazmend Demollit në Tjetër, ku i jepet mbështetje Hajrulla Çekut për kryetar të Prishtinës.

Demolli ngre një paralele mes Çekut dhe kryetarit të ri të Nju Jorkut, Zohran Mamdanit. Sipas tij, nuk ka arsye pse të mos triumfojë edhe në Prishtinë ideja e barazisë ashtu siç ndodhi në Nju Jork. Pajtohem plotësisht. Mirëpo ka një elefant në dhomë të cilin Demolli refuzon që ta shohë: kandidati i VV-së është abuzues i idesë së barazisë, jo avokues i saj.

Po them që Demolli po refuzon ta shohë abuzimin sepse ai e ka lexuar planprogramin e Çekut. Thjesht refuzoi të shërbehej me të. Aty është më se e qartë, jo vetëm për njohësit e politikave komunale por edhe qytetarët e thjeshtë me mendje të shëndoshë se barazia përdoret në mënyrë të mjegullt e shpesh edhe qesharake.

Kandidati i VV-së shkruan se Prishtina do të jetë qytet i barabartë në vitin 2035. Por, se qysh duket kjo barazi s’arrin ta imagjinojë dot përkundër që i kërkon dhjetë vjet mandat.

Më pas, Çeku abuzon me barazinë edhe kur flet për trafikun. Bën konstatime arbitrare si “Prishtina është e bllokuar; transporti publik s’është i besueshëm; në qytet mund të lëvizet vetëm përmes veturave”. Kjo mund të jetë thjesht dhe vetëm ndjenja e tij personale por jo realiteti i njerëzve që kanë qenë në Prishtinë të paktën një herë në pesë vitet e fundit.

Prishtina është një qytet tepër i vogël territorialisht. Ka nevojë për disa autobusë më shumë (jo për 200 siç thotë Çeku, sepse edhe këta 51 rrinë të zbrazur në shumicën e orareve) dhe për trotuare e hapësira të pandërprera për biçikleta e trotinetë. Por, ka nevojë më së shumti për një kulturë të re të transportit. E kjo ndërtohet përmes dekurajimit të njerëzve që të sillen me vetura, e jo mbrojtjes së tyre. Kjo ka ndodhur për herë të parë gjatë kohës së Përparim Ramës. Për herë të parë plot prishtinali e kuptuan se mund të ecet drejt një destinacioni tri kilometra larg.

Në këtë temë, Çeku e përmend edhe një alarm të rremë të para disa viteve kur u mbyll për herë të parë rruga Xhorxh Bush. E akuzon Ramën se e ngarkoi shumë trafikun. Kjo doli se ishte e pasaktë. Sot, trafiku në qendër është po aq i ngarkuar (në mos më pak) se para se të mbyllej për qarkullim rruga në fjalë.

Barazia është arkitekturë. Nju Jorku e votoi; Prishtina e ka radhën

Aktualisht, të vetmit njerëz që po ankohen për trafikun janë ata që gjithmonë ankoheshin: shoferët. Pra, ata njerëz që s’i ecin as dy kilometra në këmbë. Dhe pikërisht këta njerëz të papërgjegjshëm e të privilegjuar i mbron Çeku. Këta janë viktima të pabarazisë meqë po detyrohen të vozisin (“mund të lëvizësh vetëm me veturë”).

Më pas, Çeku abuzon me barazinë edhe kur flet për mbeturinat. Thotë se ato dëmtojnë më së shumti lagjet e varfra. Por, kjo po ashtu s’është e vërtetë. Është evidente për secilin se qendra dhe lagjet rreth qendrës e kanë problemin më të madh me mbeturinat.

Ndërkohë, pika më absurde është ajo ku ndërtohet ideja se në Prishtinë kemi lagje të lëna anash në raport me të tjerat. Çeku as që lodhet të na tregojë se cilat janë ato lagje? Se çfarë forme ka pabarazia në to? Për çfarë arsyesh janë lënë anash?

I bindur nga këto fjalë të Çekut, Demolli argumenton:“Kur shërbimi mungon në një lagje e është i plotë në tjetrën, nuk është rastësi – është vendim buxheti. Dhe kjo, me kalimin e vetive, të ndryshon fëmijërinë, kohën, shëndetin, sigurinë. Kthehet në fat. Fatalitet.”

Por, as ky nuk tregon se cilat lagje po diskriminohen me politika komunale. Ajo çka shohim me sytë tanë është se secila lagje e Prishtinës ka pak a shumë të njëjtat telashe. Lëre më që të jetë përzgjedhur si lagje për t’u diskriminuar nga dikush. Prandaj, është e zorshme t’i ikim gjykimit se edhe këtu kemi abuzim të qartë me idenë e barazisë.

Dhe mbajeni mend një gjë: Hajrulla Çeku po i kërkon dhjetë vjet mandat si kryetar i Prishtinës. E megjithëse po e kërkon gjithë këtë kohë, dhe megjithëse Prishtina parashihet të ketë një buxhet prej 2 miliardë eurove – ai nuk është në gjendje ta prezantojë një projekt të vetëm madhor. S’është në gjendje në fakt të premtojë as biletë falas për autobusë urbanë. Thotë se do të bëhen “të përballueshme çmimet”. Aktualisht janë 50 centë. Do t’i bëjë 40 centë?

Duhet të kesh talent të jashtëzakonshëm të mos dalësh i pari në Prishtinë me mbështetjen e Albin Kurtit kur pritej që të fitoje pa balotazh. Hajrulla Çeku e ka këtë talent dhe prishtinasit e kuptuan. Shkëputja e tij me realitetin e përditshëm është aq e madhe, sa natyrisht se krejt çka ofroi ishin këto gjysmë-idesh qesharake e pa mbështetje. Mirëpo, abuzimi i tillë me barazinë si ide është i rrezikshëm. Nëse nesër një kandidat më serioz i VV-së (ose ndonjë partie tjetër) për Prishtinën e ka seriozisht barazinë, kush do t’i besojë?!

P.S. Kjo që e thashë në këtë shkrim nuk nënkupton se nuk kam kritika edhe për Përparim Ramën si kryetar të Prishtinës. Në rundin e parë e pata mbështet Besa Shahinin e PSD-së.