Para disa ditëve bëri jehonë sulmi i shkrimtarit Ag Apolloni ndaj Kujtim Shalës së LDK-së. Mirëpo, Kujtim Shala s’ishte ‘viktima’ e vetme e fjalës së shkrimtarit. Lista e njerëzve të sulmuar ishte shumë e gjatë.
Apolloni ato sulme i bëri në një fjalim ku po nderohej akademik Rexhep Qosja, që vdiq në prillin e këtij viti.
Sa për rikujtim po e përmendim sulmin ndaj Kujtim Shalës. Apolloni pretendon se Shala “i turrej profesorit nëpër korridore për ta sulmuar fizikisht.” Ai thotë se ishte dëshmitar i këtyre turrjeve. Pra, kanë ndodhur disa herë.
Shkrimtari nga Kaçaniku vazhdon tutje duke thënë se “për këto sulme, Partia e shpërbleu shumë shpejt me poste politike…”
Me “Parti” e ka fjalën për LDK-në.
Shkëlzen Gashi
Ag Apolloni sulmon disa ojq si Admovere, Integra, KEC e KFOS për shkak të një hulumtimi ku njollosej Qosja. Dhe për shkak të qasjes armiqësore ndaj tij.
Gashi ishte autor i hulumtimit në fjalë që titullohet “Instituti i vetizoluar” e ku paraqiten një mal me probleme në funksionimin e tij.
Dukagjin Pupovci
Dukagjin Pupovci prezantohet në këtë fjalim si djali i Syrja Pupovcit, e i cili sipas Apollonit ishte shërbëtor i devotshëm i regjimit serb.
Po ashtu, në fund të fjalimit ai i vargon sulmet më të rënda ndaj tij duke e paraqitë edhe si figurë potencialisht të korruptuar.
“fëmijët e tyre [ individëve që i shërbenin Serbisë] që u pasuruan çuditshëm pas lufte dhe morën nën kontroll arsimin në Kosovë, duke sulmuar universitetin publik për ta fuqizuar shkollën e vet private…”
Me shkollë private e ka fjalën për Mileniumin e Tretë ku Dukagjin Pupovci është udhëheqës.
Rektori Arben Hajrullahu
Rektori akuzohet se ishte pjesë e OJQ-së Admovere. Dhe se as nuk e kishte përkujtuar Qosjen në rastin e vdekjes së tij. Po ashtu, akuzohet si një servil që e ka nderuar kryeministrin dhe presidenten dhe tashmë ndihet rehat e i “imunizuar”.
Qytetarët e Shtimes
“…ministri i Arsimit, Agim Veliu, solli një drejtor nga Shtimja për ta larguar Rexhep Qosjen.” – tha Apolloni.
Ky është një sulm provincial sepse inferiorizon qytetarët e Shtimes. Këtu bëhet fjalë për kohën kur Qosja ishte larguar nga pozita e drejtorit të Institutit Albanologjik.
Agim Veliu
Në të njëjtën fjali, pra, sulmohet edhe Agim Veliu. S’e harruam.
Prishtina
Thotë se s’ishte bash qytet kur Rexhep Qosja erdhi nga fshati i tij.
Ka edhe tjerë
Ka edhe të tjerë që sulmohen, por që ose s’janë fort të rëndësishëm ose sulmi ndaj tyre ishte relativisht i butë.
Asnjë prej njerëzve të sulmuar – përfshirë Kujtim Shalën – nuk është marrë me këto sulme e akuza të Apollonit deri tash.
P.S. Tash e kemi rifunksionalizu faqen e tjeter.net. Hin e këqyre. Dhe nëse dëshiron të punosh si ne vullnetarisht, na shkruaj në [email protected]. E nëse s’e ke bërë ende Like e Subscribe, bëje. S’kushton asgjë.